kon ek berge uitloop en
blomme plant
saans na rookvure en mis
in die klowe kyk en die vleiloerie
hoor roep
saam met my pa
kon ek branders en meeue dophou vir ure
rooiaas en siffies uithaal
in diep skeure
saam met my pa
kon ek skemeraand tussen dennebome draf en
geelhout en watervalle groet
plaashekke oopmaak en
dennetolle optel toe die loop swaar raak
saam met my pa
kon ek leer vuurmaak en houtkap selfs
kettie skiet en
klippe laat spring op die dam
saam met my pa kon ek psalms sing
sonder om asem te haal as ek luister
na sy stem wat mooier as enigiemand anders
uitstyg
hemel toe
saam met my pa kon ons kilometers klippad ry sonder woorde
met toebroodjies ‘n milky bar en koffie
en as ek opkyk weet ek
hy verstaan my dink
saam met my pa
kon ek wees
en wonder
en droom
en as ek sou wegbeur na ‘n aweregse pad het sy arm
my naby gehou
saam met my pa